Անցնել հիմնական բովանդակությանը
Ծառայությունների միասնական հարթակ Ծառայությունների միասնական հարթակ（https://hartak.am/） Իմ Տվյալները（https://mydata.hartak.am）
Հայերեն
Վերադառնալ
Ուղեցույց
Ինչպե՞ս ստանալ և փոխանակել նույնականացման (ID) քարտը
16 տարին լրանալուց հետո ՀՀ քաղաքացիները կամավոր կերպով կարող են ստանալ նույնականացման քարտ, որը անձի ինքնությունը և քաղաքացիությունը հավաստող փաստաթուղթ է՝ նախատեսված ՀՀ տարածքում օգտագործելու համար։ Նույնականացման քարտը տրամադրվում է 10 տարի վավերականության ժամկետով ։
Ստանալ նույնականացման քարտ
Ուշադրություն Ամրագրումներն այս պահին հասանելի են մինչև հոկտեմբերի 31-ը։ Նոյեմբերի 1-ից կգործի անձը հաստատող փաստաթուղթ ստանալու նոր էլեկտրոնային միասնական հարթակ։
Առցանց ամրագրել այց նույնականացման քարտ ստանալու համար
Սկսել（https://hartak.am/services/18004d7a-879f-4425-9bca-42fde68e14b6/offline_book_visit）
Ի՞նչ պահանջի է անհրաժեշտ բավարարել նույնականացման քարտ ստանալու համար
Նույնականացման քարտ ստանալու համար անհրաժեշտ է գրանցված լինել ՀՀ տարածքի որևէ հասցեում։（https://hartak.am/guides/%D5%A3%D6%80%D5%A1%D5%B6%D6%81%D5%BE%D5%A5%D5%AC-%D5%B0%D5%A1%D5%BD%D6%81%D5%A5%D5%B8%D6%82%D5%B4）
Ի՞նչ փաստաթղթեր է անհրաժեշտ ներկայացնել նույնականացման քարտ ստանալու համար
Նույնականացման քարտ ստանալու համար անհրաժեշտ է ներկայացնել անձնագիր կամ ծննդյան վկայական և դրա լուսապատճենը։
Փաստաթղթերն օտար լեզվով կազմված լինելու դեպքում անհրաժեշտ է ներկայացնել նաև դրանց՝ նոտարական կարգով կատարված և վավերացված հայերեն թարգմանությունները։
Մինչև 18 տարեկան անձն անձնագիր չունենալու դեպքում հավելյալ ի՞նչ փաստաթղթեր պետք է ներկայացնի
Մինչև 18 տարեկան անձն անձնագիր չունենալու դեպքում պետք է ներկայացնի նաև իր և ծնողի գրավոր համաձայնությունը նույնականացման քարտ ստանալու մասին։
Ընդ որում՝ եթե ծնողն անձամբ չի կարող ներկայացնել իր համաձայնությունը, ապա ներկայացվող համաձայնության վրա նրա ստորագրության իսկությունը պետք է վավերացված լինի նոտարական կարգով։
Զինապարտ քաղաքացիները հավելյալ ի՞նչ փաստաթղթեր պետք է ներկայացնեն
Զինապարտ լինելու դեպքում (18-55 տարեկան քաղաքացիներ) անհրաժեշտ է ներկայացնել զինվորական գրքույկը։
Զինվորական գրքույկ չունենալու դեպքում անհրաժեշտ է ներկայացնել տեղեկանք, որը տրամադրվում է տարածքային զինկոմիսարիատի կողմից։ ՀՀ ՊՆ զինվորական կոմիսարիատների հասցեները ներկայացված են հղումով（https://mil.am/hy/military-enlistment）։
Որքա՞ն է անհրաժեշտ վճարել նույնականացման քարտ ստանալու համար
Նույնականացման քարտի համար անհրաժեշտ է վճարել 3,000 ՀՀ դրամ, և այն կտրամադրվի դիմելուց հետո 15-րդ աշխատանքային օրը ։
Վճարումը հնարավոր է կատարել բաժանմունքում տեղադրված վճարային տերմինալով կամ նախապես（https://www.e-payments.am/hy/state-duties/step3/service=602/）՝ ներկայացնելով վճարման անդորրագիրը։
Վճարման բանկային հաշվեհամարը սահմանված ժամկետում նույնականացման քարտը ստանալու համար՝ 900005162178 ։
Նախապես վճարելու դեպքում վճարման անդորրագիրն անհրաժեշտ է ներկայացնել թղթային տարբերակով , քանի որ այն կցվելու է քաղաքացու փաստաթղթերին (էլեկտրոնային եղանակով ներկայացված անդորրագրերը չեն ընդունվում)։
Որքա՞ն է անհրաժեշտ վճարել նույնականացման քարտն ավելի շուտ ստանալու համար
Հնարավոր է նույնականացման քարտը նաև ավելի շուտ ստանալ՝ կնքելով պայմանագիր։ Պայմանագրի կնքման կարգն ու մանրամասները անհրաժեշտ է ճշտել այն անձնագրային բաժնից, որտեղից պատրաստվում եք ստանալ Ձեր նույնականացման քարտը։
Վճարումները կատարվում են հետևյալ չափով՝
3,000+20,000 ՀՀ դրամ՝ նույնականացման քարտը 1 աշխատանքային օրվա ընթացքում ստանալու համար,
3,000+10,000 ՀՀ դրամ՝ նույնականացման քարտը 3-րդ աշխատանքային օրը ստանալու համար,
3,000+5,000 ՀՀ դրամ՝ նույնականացման քարտը 5-րդ աշխատանքային օրը ստանալու համար։
Վճարումը հնարավոր է կատարել միայն բաժանմունքում տեղադրված վճարային տերմինալով։
Ի՞նչ է անհրաժեշտ անել գրասենյակում նույնականացման քարտ ստանալու համար դիմելիս
Անհրաժեշտ է գրասենյակում լուսանկարվել և հանձնել աջ և ձախ ձեռքերի բոլոր մատների մատնահետքերը, ինչի նպատակն անձնական տվյալների տեղեկատվական բազաներում քաղաքացու նույնականացումն ապահովելն է։
Ո՞ր դեպքերում քաղաքացին կարող է լուսանկարահանվել և մատնահետքերը հանձնել իր բնակվելու կամ գտնվելու վայրում
Քաղաքացին կարող է լուսանկարահանվել և մատնահետքերը հանձնել իր բնակվելու վայրում, եթե՝
բժշկական հաստատությունում բժշկական օգնություն և սպասարկում է ստանում,
հաշմանդամության, հիվանդության, տարիքային կամ այլ խնդիրներով պայմանավորված՝ չի կարողանում ինքնուրույն տեղաշարժվել։
Այս դեպքում քաղաքացու նույնականացման քարտը ստանալու համար դիմումը ներկայացնում է նրա խնամակալը կամ ներկայացուցիչը՝ նախապես առցանց հերթագրվելով և ներկայացնելով անհրաժեշտ փաստաթղթերը։
Ինչպե՞ս կարող են քրեակատարողական հիմնարկում գտնվող քաղաքացիները նույնականացման քարտ ստանալ
Քրեակատարողական հիմնարկում գտնվող քաղաքացիները նույնականացման քարտ ստանալու համար պետք է դիմեն քրեակատարողական հիմնարկի վարչակազմին , որի գրության հիման վրա էլ կկազմակերպվի քաղաքացու գտնվելու վայրում շարժական սարքերով մատնահետքեր վերցնելու և տեղում անձին լուսանկարելու գործընթացը: